नेपालगञ्ज, असार १६ । नेपालगञ्ज उपमहानगरपालिका वडा नम्बर १८ ले शनिबार वृहद वडा भेला गरेको छ । आर्थिकवर्ष २०८०।८१ को वडा स्तरीय योजना तथा कार्यक्रम तर्जुमाका लागि वडा भेला आयोजना गरिएको वडा अध्यक्ष दिपक वर्माले जानकारी दिनुभयो । भेलामा वडा अध्यक्ष वर्माले चालु आर्थिकवर्षमा सम्पन्न भएका योजनाहरु बारे जानकारी दिनुभएको छ । वडाभित्र सडक तथा नाली निर्माणका अधिकाँश योजना चालु आवमा सम्पन्न भएको र सम्पन्न हुने चरणमा रहेको वर्माले बताउनुभयो ।
वडाबासीहरुको खचाखच उपस्थिती रहेको कार्यक्रममा वडा अध्यक्ष वर्माले सडक तथा पूर्वाधार निर्माणसँगै शिक्षा, स्वास्थ्य र खानेपानी तथा कृषिमा पनि प्राथमिकता दिइएको बताउनुभयो ।
उहाँले वडा तथा उपमहानगपालिका सहित प्रदेश तथा संघ सरकारबाट प्राप्त सहयोगमा वडाभित्र विकास निर्माणका कार्य अघि बढाइएको जानकारी दिदैं ठुलो र धेरै बस्ती भएका कारण अझैपनि धेरै काम गर्न बाँकी रहेको बताउनुभयो ।
कार्यक्रममा नेपालगंज उपमहानगरपालिकाका प्रमुख प्रशान्त विष्टले वडाबासीको आवश्यकता अनुसार प्राथमिकीकरण गरेर योजना छनौंट गर्न सुझाव दिनुभयो । उहाँले सिमित श्रोतसाधनबाट असिमित काम गर्नुपर्ने बाध्यता बुझिदिन आग्रह गर्नुभयो । सो कार्यक्रममा आगामी आर्थिकवर्षका लागि विभिन्न योजना स्थानीयबासीले माग गरेका छन् । आगामी आवको बजेट सिलिङ प्राप्त भएपछि वडा भेला गरिएको हो । कार्यक्रममा वडा सदस्य दिग्विजय ढुंगाना, वडा नम्बर २० का अध्यक्ष कौशकुमार धोवी, वडा नम्बर ४ का अध्यक्ष गोपाल पुन, एमाले नेपालगञ्ज कमिटीका अध्यक्ष दत्तप्रसाद आचार्य लगायतले विभिन्न सुझाव दिनुभएको थियो ।
लोकप्रिय न्यूज । १६ असार २०८०, शनिबार १८:०३