नेपालगन्ज, फागुन २३ । नेकपा एमाले बाँकेले २०४९ सालयता हालसम्म स्थानीय तहको निर्वाचनमा पार्टीबाट उम्मेदवार बनेका स्थानीय नेताहरुलाई शनिबार नेपालगञ्जमा सम्मान गर्दैछ । नेकपा एमाले बाँके स्थानीय विकास विभागले आयोजना गर्न लागेको कार्यक्रममा २०४९, २०५४, २०७४ र २०७९ सालमा भएको स्थानीय निर्वाचनमा वडादेखि पालिका, गाविसदेखि जिविससम्म उम्मेदवार बनेका नेताहरुलाई सम्मान गरिनेछ ।
नेकपा एमाले स्थानीय विकास विभागका प्रमुख मिन मल्लले कार्यक्रमको सम्पूर्ण तयारी पूरा भएको जानकारी दिनुभयो । सम्मानसँगै महासचिव शंकर पोखरेलको प्रमुख आतिथ्यतामा अभिमुखिकरण कार्यक्रम समेत हुनेछ । विहान ११ बजे एमाले बाँकेको पार्टी कार्यालय नेपालगञ्जमा कार्यक्रम हुनेछ । यो कार्यक्रममा सहभागिताका लागि पार्टीबाट भएका उम्मेदवारहरुलाई घरमै पुगेर आमन्त्रण गरिएको छ ।
विभागले पार्टीका पालिका र वडा कमिटीको सहयोग लिएर उम्मेदवार पहिचान तथा निमन्त्रण गरेको विभागका प्रमुख मल्लले बताउनुभयो । पार्टीले लामो समयपछि समरण गरेपछि पुराना कार्यकर्ताहरुमा उत्साह छाएको छ । साविक बागेश्वरी गाविस वडा नम्बर ९ बाट निर्वाचित वडाध्यक्ष देबबहादुर रोकायले जिल्ला पार्टीले पुराना कार्यकर्तालाई स्मरण गर्नु सह्रानीय कार्य भएको बताउनुभयो । कार्यक्रममा केन्द्रीय कमिटी सचिव एवं लुम्बिनी प्रदेश इन्चार्ज पद्म अर्याल सहितका नेताहरुको सहभागीता हुनेछ ।
लोकप्रिय न्यूज । २३ फाल्गुन २०८१, शुक्रबार २१:४२