नेपालगञ्ज, फागुन २९ । बाँकेको खजुरास्थित ज्ञानोदय बहुमुखी पब्लिक क्याम्पसमा अध्यक्षमा उम्मेदवारी दिएका बिद्यार्थी नेता कृष्णचन्द ठकुरीले बुधबार उम्मेदवारी फिर्ता लिनुभएको छ । बुधबार बिहान निर्वाचन समितिको कार्यालयमा पुगेर ठकुरीले उम्मेदवारी फिर्ता लिनुभएको हो ।
अनेरास्ववियु बाँकेका सहसचिव तथा क्याम्पसका स्ववियु उपसभापति समेत रहनुभएका ठकुरी अध्यक्षका प्रबल दाबेदारको रुपमा रहनुभएको थियो । अनेरास्ववियुले सर्बिन महतोलाई अध्यक्षको उम्मेदवार बनाएपछि ठकुरीले बागी उम्मेदवारी दिनुभएको हो ।
नेकपा एमाले खजुरा गाउँपालिका कमिटीका सचिव रोशन शाहीले ठकुरीले संगठनको निर्णय स्वीकार गर्दै उम्मेदवारी फिर्ता लिएको बताउनुभयो । ज्ञानोदयमा नेबिसंघ र अनेरास्ववियुको संयुक्त गठबन्धन रहेको छ ।
यसैगरी अखिल क्रान्तिकारी नेतृत्वको गठबन्धनबाट अध्यक्षमा मो. आसिफ साईको उम्मेदवारी परेको छ । ठकुरीले उम्मेदवारी फिर्ता लिएपछि क्याम्पसमा अखिल नेबसिंघको संयुक्त गठबन्धन र अखिल क्रान्तिकारी नेतृत्वको गठबन्धनबीच प्रतिष्पर्धा हुनेछ ।
उम्मेदवारी फिर्ता लिएका ठकुरीले सर्बिन नेतृत्वको नेबिसंघ र अखिल नेतृत्वको संयुक्त गठबन्धनलाई जिताउन सबैमा अपिल गर्नुभएको छ ।
लोकप्रिय न्यूज । २९ फाल्गुन २०८१, बिहीबार १४:१४