नेपालगञ्ज, पुस २१ गते । नेपालगञ्ज उप–महानगरपालिकाका विभिन्न वडामा दादुराको संक्रमण देखिएको छ ।
संक्रमित मध्ये वडा नम्बर ५ का ३१ महिनाका बालकको निधन भएको स्वास्थ्य कार्यालय बाँकेका खोप अधिकृत नरेश श्रेष्ठले जानकारी दिनुभयो । बुधबारसम्म २८ जनामा संक्रमण पाइएको छ । नगरका वडाहरु ५,७,८,१०,१५ र २२ गरि ७ वडामा दादुरा देखिएको छ । दादुरा संक्रमि देखिएका अधिकाँश बालबालिकाले सम्पूर्ण खोप नलगाएको स्वास्थ्य कार्यालयले जनाएको छ ।
बालबालिकालाई १३ प्रकारका खोप लगाइन्छ । ति मध्ये दादुराको खोप ९ महिना र १५ महिनामा लगाउने गरिन्छ ।पहिलो पटक लगाउने डिपिटी खोपले बालबालिकामा ज्वरो आउने भएकाले त्यसपछिका खोप अभिभावक डराएर छुट्ने गरेको स्वास्थ्य कार्यालयले जनाएको छ । संक्रमित बालबालिकाले पहिलो खोप लगाएपछि दोश्रो मात्रा छुटेको पाइएको छ । नेपालगञ्ज उप–महानगरपालिकाले दादुरा नियन्त्रणका लागि अभियान चलाउने भएको छ । १५ वर्ष उमेर समूहका बालबालिकालाई दादुराको खोप दिइने भएको छ ।
लोकप्रिय न्यूज । २१ पुष २०७९, बिहीबार ११:५५