बाँके, चैत २१ । बाँकेमा लो भोल्टेज र छिनछिनमा विद्युत जाने समस्या समाधानका लागि थप दुई स्थानमा सव स्टेशन निर्माण गर्न लागिएको छ । जिल्लाको खजुरा गाउँपालिका र जानकी गाउँपालिकामा सव स्टेशन निर्माणका लागि टेण्डर भईसकेको नेपाल विद्युत प्राधिकरण खजुरा नोलाईट शाखाका प्रमुख कृष्ण पौडेलले जानकारी दिनुभयो । सव स्टेशन निर्माणको काम अबको दुईवर्ष सम्पन्न हुने छ ।
खजुरास्थि जनक शिक्षा सामाग्री केन्द्रसँगै रहेको करिब दुई विघा जग्गामा ३३/११ केभी क्षमताको सन स्टेशन निर्माण गरिनेछ । जहाँबाट ३३ हजार किलो भोल्टको डबल सर्किट विद्युत प्रवाह हुनेछ ।
“खजुरामा निर्माण गरिने सव स्टेशनमा १६÷१६ एमभी क्षमता दुईवटा ट्रान्सफर्मर जडान गरिनेछ,” नेपाल विद्युत प्राधिकरण खजुरा नोलाईट शाखाका प्रमु ख कृष्ण पौडेलले भन्नुभयो, – “११ केभि क्षमताका ८ वटा सर्किटबाट विद्युत आउटगोइङ हुनेछ । ” सव स्टेशनसँगै कन्ट्रोल भवन, कर्मचारी आवास निर्माण गरिनेछ । यसैगरी जानकी गाउँपालिकामा चार विघा जग्गामा १३२ केभिए क्षमताको सव स्टेशन निर्माण गरिने भएको छ । जहाँबाट डबल सर्किट खजुरासँग जोडिनेछ । खजुरा र जानकीमा सव स्टेशनको काम सम्पन्न भएमा न्यून भोल्टेज, छिनछिनमा विद्युत आउने जाने र बर्षातको समयमा विद्युत अनियमित हुने समस्यामा सुधार आउने प्राधिकरणले जनाएको छ ।
सव स्टेशनले जिल्लाकै समग्र विद्युत समस्या समाधान हुने तथा
औद्योगिक क्षेत्रको रुपमा विकास भईरहेको जानकी र खजुरामा दिर्घकालिनरुपमा विद्युत समस्या नपर्ने प्राधिकरणले जनाएको छ । हाल नेपालगञ्जको गोसाईगाउँ र बसपार्क तथा कोहलपुरमा सव स्टेशन रहेका छन् । नयाँ सव स्टेशन निर्माण भएपनि विद्युत आपुर्ती नियमित, विश्वसनीय र गुणस्तरीय हुने नोलाईट शाखा प्रमुख पौडेलको भनाई छ । (गोरखापत्र अनलाईनबाट )
लोकप्रिय न्यूज । २१ चैत्र २०७९, मंगलवार १९:४२