नेपालगञ्ज, जेठ १७ । नेपालगञ्ज उप–महानगरपालिका वडा नम्बर १८ कारकादौंले विद्यालयमा अध्ययनरत विद्यार्थी मार्फत साईबर अपराध नियन्त्रणको पहल थालेको छ । नेपालगञ्जका विभिन्न विद्यालय तथा कलेजमा अध्ययनरत विद्यार्थीहरु र शिक्षकलाई बुधबार साईबर अपराधका विषयमा सचेतनामुलक कार्यक्रम गरिएको वडा अध्यक्ष दिपक वर्माले जानकारी दिनुभयो । विद्यार्थीमार्फत अभिभावक र समुदायलाई साईबर अपराधबारे सचेत बनाई साईबर अपराधमा कमी ल्याउन सकिने बिश्वास रहेको वर्माको भनाई छ । सो अवसरमा बाँकेका प्रमुख जिल्ला अधिकारी विपिन आचार्यले इन्टरनेटको प्रयोगका हिसावले पनि युवाहरु बढि देखिएको भन्दै साईबर अपराध नियन्त्रणका लागि युवाको महत्वपूर्ण भूमिका रहने बताउनुभयो ।
जिल्ला प्रहरी कार्यालय बाँकेका प्रमुख एसपी सन्तोषसिंह राठौरले ब्यक्तिहरु अञ्जानवस वा जानकारीको अभावमा पनि साईबर अपराधमा फसेको भन्दै प्रहरीले सबैको साथ र सहयोग खोजेको बताउनुभयो । नेपालगञ्ज उपमहानगरपालि वडा नम्बर १८ को सहयोगमा डटवक्र्स टेक्नोलोजीज नेपालगञ्जले गरेको कार्यक्रममा पत्रकार झलक गैरे, वडा सदस्य दिग्विजय ढुंगाना लगायतले साईबर अपराध नियन्त्रणमा युवा विद्यार्थीको भूमिका महत्वपूर्ण रहेको बताउनुभयो । कार्यक्रममा डटवक्र्सका प्रबन्ध निर्देशक अर्षदकमाल सिद्धिकी, जिल्ला प्रहरी कार्यालय बाँकेका प्रहरी निरीक्षक नरेश विकले सहजिकरण गर्नुभएको थियो ।
लोकप्रिय न्यूज । १७ जेष्ठ २०८०, बुधबार १७:१२