बाँके,साउन १७ गते । संगठित सदस्यता नवीकरण नगरेको भन्दै नेकपा एमालेको जिल्ला पार्टी कार्यालय नेपालगन्जमा लगाइएको ताला खोलिएको छ । मङ्गलबार दिउसो लगाएको ताला बुधबार बेलुका खोलिएको नेकपा एमाले बैजनाथ गाउँपालिका कमिटीका सचीव प्रेम सुवेदीले जानकारी दिनुभयो ।
केन्द्रीय सदस्य सुर्य ढकाल, मोहम्मद हारून,शान्ति ढकाल,दिपा शर्मा,पशुपतिदयाल मिश्र, लेखा आयोगका सदस्य बिजया धितालको उपस्थितिमा बसेको पदाधिकारी सहितको बैठकले बिहीबार दिउँसो १ बजेसम्म नवीकरण गर्न समय दिने र बिहिवार ११ बजे केन्द्रीय सदस्य र पदाधिकारी सहित संगठन बिभागको बैठक बस्ने सहमति भएको छ ।
बैजनाथ गाउँपालिका कमिटीका तर्फबाट २०७९ को एकहजार १४ जना र २०८० को ७१४ जनाको पार्टी सदस्यता नविकरण गरि जिल्ला पार्टी कार्यालयमा सम्पूर्ण विवरण सहित बुझाउँदा समेत पार्टी सदस्यता नविकरण नगरिदिएको दावी पालिका कमिटीको छ । जिल्ला अध्यक्ष किस्मतकुमार कक्षपतिले नवीकरण हुनबाट रोकेको पालिका कमिटीको दाबी भएपनी बैठकमा अध्यक्ष कक्षपति अनुपस्थित रहनुभएको थियो ।
लोकप्रिय न्यूज । १८ श्रावण २०८०, बिहीबार १२:४०