नेपालगञ्ज, असोज ५ गते । बाँकेको डुडुवा गाउँपालिकास्थित जयेन्दु वाल सुधार गृहमा रहेका दुई समूहबीच झड्प भएको छ । राती भएको झड्पमा एकजनाको निधन भएको छ भने १० जना गम्भिर घाइते भएको बालसुधार गृहका इन्चार्ज विमला काउचामगरले जानकारी दिनुभयो ।
दोहोरो झड्पमा घाइते भएका अपहरण, शरिरबन्धक र जबरजस्ती करणीको मुद्धामा सजाय पाएका कपिलवस्तु रुद्रपुरका सुलभ केसीको उपचारकाक्रममा अस्पतालमा निधन भएको हो । त्यहाँ आगजनी र तोडफोड पनि गरिएको छ । केही ब्यक्ति भागेको अनुमान गरिएको छ ।
गम्भिर घाइतेहरुको शिक्षण अस्पताल नेपालगञ्जमा उपचार भईरहेको छ । बालसुधार गृहमा पटक–पटक झड्प हुँदै आएको छ । बालसुधार गृहभित्र राती झड्प नियन्त्रणका लागि सुरक्षा निकाय समेत प्रवेश गर्न समस्या भएको थियो । भित्रको अवस्थाबारे अहिलेसम्म पनि एकिन भएको छैन । पछिल्लो पटक लागु औषध मुद्धाका बालकहरुलाई ल्याईपछि बालसुधारगृहमा रहेका अन्य ब्यक्तिहरुसग पटक–पटक तनावपूर्ण अवस्था आउने गरेको थियो ।
यसअघि माघ अन्तिमसातापनि दुईपक्षबीच झडप भएपछि आगजनी र तोडफोड गरिएको हो । बालिग भएपनि यही बस्न पाउने भएकाले दोहोरो झडपका घटना बढि हुने गरेको पाइएको छ । जिल्ला प्रहरी कार्यालयका डिएसपी नारायण डाङ्गीले भित्र रहेका ब्यक्तिहरुलाई सम्झाईबुझाई मनाउने प्रयास भईरहेको बताउनुभयो ।
लोकप्रिय न्यूज । ५ आश्विन २०८०, शुक्रबार १०:०४