बाँके, असोज १३ गते । राष्ट्रिय स्वतन्त्र पार्टी (रास्वपा)का सभापति रवि लामिछानेले नेपालगञ्जबासीको प्रशंसा गरेका छन् । पार्टी कार्यक्रममा सहभागी हुन शनिबार आउनुभएका लामिछानेले नेपालगञ्जबासी परिवर्तनको पक्षमा भएको दावी गर्नुभयो । उहाँले मिसन–८४ नेपाली जनताको अभियान हुनुपर्ने बताउनुभयो ।
रास्वपाको नेपालगञ्ज नगर भेलालाई शनिबार सम्बोधन गर्दै सभापति लामिछानेले पुराना राजनीतिक दलले देश बनाउने हो भने अहिले पनि चारवर्षको प्रर्याप्त समय रहेको दावी गर्नुभयो । राष्ट्रिय स्वतन्त्र पार्टीलाई बाहिर राखेर प्रमुख दलहरु मिलेर सरकार बनाउन उहाँले सुझाव दिनुभयो ।
सभापति लामिछानेले भन्नुभयो, ‘लामो समय सत्तामा रहेका दल र नेताहरुले अब पनि मिसन–८४ भन्नु भनेको फेरी पनि जनतामाथिको बेइमानी र धोका हो ,मिसन ८४ को अभियान राजनीतिक दलले नभई जनताले चलाउनुपर्ने अभियान हो । ’
बर्तमान सरकारलाई शङ्काको सुविधा दिएर समर्थन जनाएको भन्दै सभापति लामिछानेले सरकारले प्रत्येक दिन जन विरोधी र देश बिरोधी निर्णय गर्दै आएको दावी गर्नुभयो । सरकारको निर्णयको बिरोध गर्ने हो भने माईतीघर मण्डलामै बास हुने भन्दै उहाँले सरकारको ध्यान अलोकप्रिय निर्णयमा जाने गरेको बताउनुभयो । अनुन्धानमा खटिएका राष्ट्रसेवक कर्मचारीलाई सरुवा गरेर सरकारले थप ब्यक्तिलाई जोगाउने काम गरिरहेको उहाँको भनाई छ ।
राजनीतिक दलका नेताहरु कमाउ धन्दामा लागेका कारण देश बन्न नसकेको भन्दै राजनीतिक दलका भातृ सङ्गठनका कारण पनि समस्या उत्पन्न हुने गरेको उहाँको भनाई छ । राजनीतिक दलको नेतृत्वले मतदातालाई नभई चन्दादातालाई हेरेर कानून बनाउने गरेको भन्दै उहाँले राजनीतिक दलको नेतृत्वका कारण देशले दुःख पाएको टिप्पणी गर्नुभयो । उहाँले जनताले सिटामोल र जीवनजल नपाउने तर नेताहरु विदेशमा उपचार गर्न जाने प्रचलन बन्द गर्नुपर्ने बताउनुभयो ।
पार्टीमा परिवारवाद, आफन्तवाद र कार्यकर्तावाद निषेद गरिएको भन्दै उहाँले ब्यक्तिको आदेशमा नभई विधीको शासनमा पार्टी सञ्चालन भईरहेको बताउनुभयो ।
कार्यक्रममा केन्द्रीय सदस्य रमेश प्रसाई, प्रतिनिधीसभा सदस्य लक्ष्मी तिवारी लगायतले मन्तव्य राख्नुभएको थियो ।
लोकप्रिय न्यूज । १३ आश्विन २०८०, शनिबार २१:५१