गोविन्द शर्मा
बाँके, असार ११ गते । लुम्विनी प्रदेश सरकार अन्तर्गतको भौतिक पूर्वाधार मन्त्रालयले बाँके र बर्दियालाई जोड्न मध्यमार्गी लोकमार्गको निर्माण अघि बढाउन बजेट विनियोजन गरेको छ ।बाँकेको नेपालगञ्ज उपमहानगरपालिका वडा २० को राँझा चोकदेखि बर्दियाको राजापुर नगरपालिका जोड्ने राँझा–राजापुर (बाँके–बर्दिया) मध्यमार्गी लोकमार्ग अन्तर्गत आगामी आर्थिक बर्ष २०८०–८१ मा बाँके र बर्दिया दुबै तर्फबाट सडक निर्माणको काम सुरु गर्न बजेट विनियोजन भएको सडक पूर्वाधार कार्यालय बर्दियाका प्रमुख गोविन्द महताराले बताउनुभयो ।
सडक पूर्वाधार विकास कार्यालय बाँके अन्तर्गत राँझा–राजापुर मध्यमार्गी लोकमार्गको राँझा चोकदेखि गुरुवागाउँ–गिजरा–ईगाउँ खण्डका लागि एक करोड ५० लाख रुपियाँ बजेट विनियोजन गरिएको छ ।यसैगरी, राँझा–राजापुर मध्यमार्गी लोकमार्ग बर्दियाको दौलतपुरघाटदेखि सैजनाघाट पर्सेनीबजार सडकखण्ड निर्माणका लागि सडक पूर्वाधार कार्यालय बर्दियाका लागि दुई करोड रुपियाँ बजेट विनियोजन गरिएको छ ।
यो सडक निर्माण भएमा बाँके र बर्दियाका दर्जन स्थानीय तहका हजारौंलाई यातायातको सहजता हुने देखिन्छ । बाँके ३ (१) बाट निर्वाचित लुम्विनी प्रदेश सांसद रत्न खत्रीले यो सडक बाँके र बर्दियाको भित्रीवस्तीका हजारौं बासिन्दाका लागि आवश्यक भएको बताउनुभयो ।प्रदेशसभा सदस्य खत्रीले भन्नुभयो, ‘यो मार्गले नेपालगञ्ज विमानस्थलदेखि बर्दियाका पर्यटकीय स्थलसम्म पुग्न थप सहजता हुन्छ, ग्रामीण वस्तीमा कालोपत्रे सडकको पहुँच पनि पुग्नेछ ।’
स्थानीय शासनका जानकार मिनबहादुर मल्लले बाँके र बर्दिया जोड्न नयाँ सडक निर्माणको योजना आउनु आफैमा सकारात्मक भएको बताउनुभयो । करिब एक सय किलोमिटर लामो सडकका लागि छुट्टाइएको बजेट न्यून भएको भन्दै उहाँले यसलाई राजनीतिक स्टन्टको रुपमा नभई निर्माण सम्पन्न गर्नेगरी प्राथमिकता दिनुपर्ने माग गर्नुभयो । (गोरखापत्रअनलाईनबाट साभार)
लोकप्रिय न्यूज । ११ असार २०८०, सोमबार १४:०२